Tuesday, August 11, 2015

'வாலு' வெளியீட்டைத் தடுக்கிறேனா?- உதயநிதி ட்விட்டர் ட்விஸ்ட்

உதயநிதி ஸ்டாலின்| கோப்புப் படம்.
உதயநிதி ஸ்டாலின்| கோப்புப் படம்.
'வாலு' படத்தை வெளியிட விடாமல் தடுக்கிறார் என்று ட்விட்டர் தளத்தில் கூறிவந்த சிம்பு ரசிகர்களுக்கு, காட்டமாக பதிலளித்திருக்கிறார் உதயநிதி ஸ்டாலின்.
விஜய்சந்தர் இயக்கத்தில் சிம்பு, ஹன்சிகா நடித்திருக்கும் 'வாலு' படத்தை ஆகஸ்ட் 14ம் தேதி வெளியிட முயற்சிகள் மேற்கொண்டு வருகிறார்கள். மேலும், படத்துக்கு பல்வேறு தரப்பில் பிரச்சினைகள் நிலவி வந்ததால், ஒவ்வொரு பிரச்சினையாக முடித்து வருகிறார்கள். ஆகஸ்ட் 14ம் தேதி படத்தை வெளியிடுவதிலும் சிக்கல் நீடித்து வருகிறது.
ராஜேஷ் இயக்கத்தில் ஆர்யா நடித்திருக்கும் 'வாசுவும் சரவணனும் ஒண்ணா படிச்சவங்க' படமும் ஆகஸ்ட் 14ம் தேதி வெளியாக இருக்கிறது. ஆர்யா நடிப்பில் வெளியாகும் 25வது படம் என்பதால், படத்தை பிரம்மாண்டமாக வெளியிட திட்டமிட்டு இருக்கிறார்கள்.
மேலும், ஆகஸ்ட் 14ம் தேதி வெளியீடு என்பதை ஒரு மாதத்துக்கு முன்பே அறிவித்து அதற்கான பணிகளை மேற்கொண்டு வந்தார்கள். இப்படத்துக்கு திரையரங்குகள் ஒப்பந்தம் மட்டும் உதயநிதி ஸ்டாலின் செய்து கொடுக்கிறார்.
இந்நிலையில், ஆகஸ்ட் 14ம் தேதி 'வாலு' வெளியாக கூடாது என்று உதயநிதி ஸ்டாலின் முயற்சி செய்து வருகிறார் என்று தகவல்கள் வெளியாகின. இதனைத் தொடர்ந்து சிம்பு ரசிகர்கள், உதயநிதிக்கு எதிராக ஹாஷ்டேக் ஒன்றை தயார் செய்து ட்ரெண்ட் செய்து வந்தார்கள். மேலும், உதயநிதி ஸ்டாலின் ட்விட்டர் தளத்தை குறிப்பிட்டு திட்டி தீர்த்தார்கள் சிம்பு ரசிகர்கள்.
இதற்கு பதிலளிக்கும் வகையில், "இது மிகவும் நகைப்புக்குரியதாக இருக்கிறது. நான் ஏன் வாலு பட ரிலீஸை தடுக்க வேண்டும். மேலும் அது எவ்வாறு முடியும். இத்தகைய முடிவுகளுக்கு வருவதற்கு முன் நன்றாக யோசியுங்கள்.
அர்த்தமற்ற விஷயங்களை பதிவு செய்து காரணமே இல்லாமல் ட்விட்டரில் நான் டிரெண்டாகிக் கொண்டிருக்கிறேன். நான் எந்த ஒரு நட்சத்திரத்துக்கும் எதிரானவன் இல்லை. எந்த ஒரு நட்சத்திரத்தின் ரசிகர்களும் எனக்கு எதிரி இல்லை. அடுத்தவர்களை விமர்சிக்கும் முன் புத்தியைப் பயன்படுத்த வேண்டும்.
ஒவ்வொரு படமும் அதனை தயாரிப்பவர்கள், விநியோகிப்பவர்கள், தியேட்டரில் அதை வெளியிடுபவர்களுக்கு மிகவும் முக்கியமானது. எனது படங்கள் முக்கியத்துவம் பெற வேண்டும் என நான் நிச்சயம் நினைப்பேன். ஆனால், அதற்காக அடுத்தவர் படத்தை தடுக்க மாட்டேன்" என்று காட்டமாக தனது ட்விட்டர் தளத்தில் குறிப்பிட்டு இருக்கிறார் உதயநிதி ஸ்டாலின்.



நன்றி - த இந்து

0 comments: